Гэта цёплая зімовая гісторыя пра тое, што сапраўдныя цуды часта пачынаюцца з маленькай надзеі. Кніга нагадвае дзецям і дарослым: калі верыш у магію, яна абавязкова знойдзе шлях у твой дом — нават калі за акном няма снегу.
*** Ілюстраваная зімовая гісторыя для дзяцей ад 3 гадоў пра цуды, якія здараюцца, калі ў іх верыш.
Напярэдадні Калядаў маленькая Люсі і яе брат Уліс сумуюць: за акном — ніводнага снежнага воблака. «Калі няма снегу, Каляды зусім не чароўныя», — уздыхае дзяўчынка. Усё змяняецца, калі дзеці атрымліваюць пасылку з Ісландыі. Унутры — снежны шар-цацка. Перад сном Люсі доўга разглядае яго і круціць у руках. А ноччу здараецца цуд: прама ў пакоі пачынаюць кружыцца сапраўдныя сняжынкі!
