Калядны стол. Некулінарная кніга

«Калядны стол. Некулінарная кніга» — гэта не пра рэцэпты, а пра тое, што стаіць за імі: нашы гісторыі, эмоцыі і ўспаміны. Гэта кніга пра людзей, якія гатавалі для нас і для якіх гатуем мы, пра радасці дзяцінства і моманты сапраўднага шчасця. Яна натхняе ўспомніць сваё, падзяліцца гісторыямі і ўбачыць, як ежа можа стаць мостам паміж мінулым і сучаснасцю.

***
Калі гэта не кулінарная кніга, дык якая?

Гэта кніга пра вас і пра тое, што вы ўзгадаеце, пакуль будзеце яе чытаць. Любімыя стравы, забытыя месцы і людзі, з якімі вы дзялілі ежу і сваё жыццё.

Што вы любілі есці, калі былі маленькімі? Хто для вас гатаваў калісьці і для каго вы гатуеце зараз? Што вы елі апошнім разам, калі адчувалі сябе шчаслівымі?

Калі вы не можаце ўзгадаць ніводнай гісторыі, пачніце чытаць, і ўспаміны з’явяцца над гэтымі старонкамі, нібыта пара над гарачым рондалем.