Самы цымус. Смакі і водары беларуска-габрэйскай кухні

Відэаагляд: https://www.instagram.com/reel/DJPdVqRINoF

“Самы цымус” — кніга пра смакі і кулінарную спадчыну, якая аб’ядноўвае беларусаў, габрэяў і шляхту на супольнай зямлі. Алесь Белы прапануе 15 захапляльных нарысаў пра кухню мінулага і дзясяткі арыгінальных рэцэптаў, пераплеценых з гісторыяй, гумарам і жыццём. Ілюстрацыі Юрыя Таўбкіна надаюць выданню атмасферу сапраўднага кулінарнага альбома. Гэта больш, чым кулінарная кніга — гэта культурны дакумент са смакам бабкі, кішкі і крупніку.

***

15 нарысаў і некалькі дзясяткаў арыгінальных рэцэптаў ад выдатнага знаўцы гістарычнай кухні Алеся Белага. Аўтарскія ілюстрацыі Юрыя Таўбкіна.

На свеце напісана і выдадзена процьма кніг пра габрэйскую кухню. Самых розных – сур’ёзных, вясёлых, лёгкіх, грунтоўных, мудрагелістых, трагічных… А пра гісторыю кухні беларускай кніг зусім няшмат. І вось новая кніга, незвычайная. Пра габрэйскую і беларускую кухню адначасова. І нават болей: пра кухню трох гістарычных персанажаў, што да пары жылі на адной зямлі:

• селяніна,
• пана,
• местачковага рамесніка і гандляра.

Як такое магчыма?

А бо і пан, і жыд, і мужык – маючы розную свядомасць і розныя традыцыі – елі той самы крупнік. Або бабку. Або кішку. Хоць і гатавалі іх крыху па-рознаму, і елі пад розныя нагоды. Гэтая кніга – пра знакавыя супольныя стравы трох культур.

Пра самы цымус.