Залатое зерне

«Залатое зерне» — гэта жывое сведчанне таго, як у беларускай вёсцы захоўваліся і перадаваліся старадаўнія ўяўленні пра свет. У кнізе сабраныя легенды і павер’і, пачутыя аўтарам у дзяцінстве ад бабуль і дзядуль, якія верылі ў чараўнікоў, нячыстую сілу і магічныя знакі прыроды. Гэтыя аповеды не толькі адлюстроўваюць багатую духоўную спадчыну нашых продкаў, але і пераносяць чытача ў атмасферу таямніцы, дзе рэальнасць цесна пераплятаецца з міфамі.

***
Зборнік казак, які вы трымаеце ў руках, — гэта легенды і павер’і, якія перадаюцца з пакалення ў пакаленне ў маёй сям’і. Гісторыі, пачутыя ў маленстве ад вясковых бабуль і дзядуль, натхнілі мяне на напісанне гэтай кнігі.

Беларуская вёска — сапраўдны рэлікт старадаўніх уяўленняў і звычак нашых продкаў. Магчыма, сёння гэта здаецца дзіўным, але нават у самым канцы ХХ стагоддзя сярод вясковых людзей на Лідчыне існавала (і працягвае існаваць!) шмат забабонаў і вераванняў, якія сваімі каранямі сягаюць у дахрысціянскія часы. Напрыклад, мая бабуля Юзэфа была ўпэўнена ў тым, што яе суседка па хутары наводзіць чары і крадзе ў кароў малако. А бабуля Галя пераконвала, што рапуха, якая забралася ў хату, — праяўленне нячыстай сілы, і каб адвесці няшчасце, трэба яе спаліць у печцы.

Усе гэтыя гісторыі я не забыў і пераказаў сваім чытачам.

З прадмовы Аўтара